LEDIKASYON

'spor pu lekor 

lamizik pu lespri

ledikasyon, 

pu pa mor kuyon'

samem Eric Triton dir
..

mwa, enn zenn fi 

grandi dan lamizer

gramatin tanto tand mama fer lapriyer

pu kapav sorti depi dan lamizer
.

mo rapel kan mo ti ena 6 an mama papa ti dir

'al lekol mo zanfan, to bizin lir pu gagn travay

pu gagn pitay

sinon to pu manz feray!'

monn ekute

monn trase

monn pase
.

11 an ler mo ti ena pu rant kolez, zot re dir mwa

'kontinn aprann mo zanfan, to pu gagn bon travay

bon pitay

to pa pu manz zis feyaz!'

monn persevere

bann-la gagn kuraz
.
13 an lekol finn gard mwa anprisone
19 size zot finn fer mwa antone 
tou saki mwena pou remersye ar sistem-la,
se zis so gratwite
leres,non
.
ziska ler seki monn kompran,

Newton ti enn zeni dan fizik

Pythagor ti zeni dan matematik

Da Vinci, li, dan teknolozi

me twa, ti lespri mal nouri

twa to bizin enn zeni dan tou le 19 size

kontan pa kontan, zot atan to tir to 100 lor 100

pou apre toal spesyalize dan enn zafer ki to pa neseserman kontan

.

aster pu to degre, bizin trime pu paye

bliye Harvard, bliye Oxford

liniversite moris pa gratis.

avan ti bizin aprann pu gagn travay

aster bizin travay si to le aprann pu to gagn pli bon travay

.

'mo zenfan, kontan pa kontan, degre kan gagne bel pitay gagne'

Samem granmer dir kan li vini pu lane

.

20 an mo ti gagne,

repons liniversite-la rantre

20 tyem size inn arive,

me monn deza fini satire

ziska kan sa pu dire?

mo realise ki pu vinn antreprener

pa neceser apran zistwar tou laguer

mo realise ki pu vinn dantis

pa neceser gagn bon pwin dan ekonomiks.

parey pu vin artis

pa lafin dimond si mo pa enn bon dan matematik

.

dan enn size si pann gagn A+,

pa nek nway li ar to kritik

gett so lafors, pa ziz li par so febles

gid li, montre li so bon ladres

.

mama papa, misye mis profeser

zordi kompran

konpetisyon pa ti touletan enn bon solisyon pu tou sityasyon

sirtou-la kan nou ti zil p coule ar koripsyon

.

nou, nouvo zenerasyon 

bizin zis zot kolaborasyon

pu amenn nouvo solisyon pu relev nou ti zil

.

nou zenes, nou kapav pe reprezant enn ti poursan popilasyon

me nou 100 poursan solisyon pu lavenir nou ti zil

.

nou, zenes, sans lexperyans wi

me plin ar motivasyon 

pu amenn pli lao, pli divan

nu ti zil

..

🌻 k e i r a 🌻

©